Gorbea tabernan gertatu zen erasoa joan zen asteazken iluntzean. Tabernariaren —emakumezkoa— kontra modu txarrean jokatzen ari zen gizonezko bati kargu hartu zion momentu horretan tabernan afaltzen ari zen beste gizon batek eta momentuan lortu zuen tabernatik uxatzea, baina kanpora irten zenean, zain zeukan bestea.
Biktima saiatu zen kontra egiten, baina besteak segi egin zuen jotzen eta zauriak eragin zizkion. Tabernariak taberna barrutik entzun zituen zaratak eta berak deitu zien larrialdi zerbitzuetakoei. Biktima Mendaroko Ospitalera eraman zuten, eta 24 orduz han izan zuten, zaintzapean. BARRENek jakin izan duenez, biktimak —J.M.A. gizonezko elgoibartarrak— salaketa jarria du Eibarren Ertzain-etxean.
