Euskara

barren.eus-logoa

Tokikom

 

 
 

2021 09 17 PuntuEUS elgoibar errep barren2019ko martxoan Ane Beitia Elgoibarko alkateak eta Iñaki Goirizelaia PuntuEUS Fundazioaren lehendakariak hamar urterako hitzarmena sinatu zuten, eta hitzarmen horri esker, PuntuEUS Fundazioaren egoitza nagusia Elgoibarko Altzolatarren Dorretxean dago geroztik, Elgoibarko Udalaren Kultura eta Euskara sailen bulegoak zeuden lekuan. Ez du, baina, lehengoaren konturik. Itxura modernoko bulegoa da, argitsua, eta bost laguneko lantaldeak egiten du lan bertan: Josu Waliño (zuzendaria), Lorea Arakistain (marketin arduraduna), Manex Garaio (informatikaria), Oier Albizuri (teknikari laguntzailea) eta Leire Palacios (euskara ingurune digitalean zabaltzeko proiektuen arloko arduraduna). Zuzendariak aurkeztu dizkigu bulegoa, bai eta PuntuEus fundazioaren egitekoak eta erronkak ere.

Hamahiru urte joan dira .eus domeinuaren proiektuak lehen urratsak egin zituenetik. Munduan katalanez jarduten duen Interneteko komunitatearen bilgune izateko sortu zuten .cat domeinua izan zuten eredu bultzatzaileek, eta prozesu bera jarraitu zuten. 2001ean kataluniarrek egin bezala, 2008an, PuntuEUS elkartea eratu zuten hemen, euskararen eta euskal kulturaren komunitatea egituratzeko. 58 elkarte eta erakunde batu ziren elkartean, eta 2012an, PuntuEUS Fundazioa sortu zuen elkarte horrek, Izenak eta Zenbakiak Banatzeko Interneteko Korporaziori (ICANN), munduan Internet kudeatzen duen erakundeari alegia, .eus domeinua sortzeko eskatzeko. Eskaria aztertu eta urtebete geroago eman zuen baietza ICANNek, 2013ko ekainaren 14an.

Gaur, badirudi .eus betidanik egon dela, proiektua errotua dagoelako eta asko hazi delako azkeneko urteetan, baina abian 2014an jarri zuten. Eta egun, domeinu hori kudeatzen duen PuntuEUS fundazioak Elgoibarren dauka egoitza nagusia. “Guk ez dugu domeinua saltzen hemen. Domeinuak saltzen dituztenak nazioarteko multinazionalak dira, eta horietako bakar bat ez dago Euskal Herrian. Guk hitzarmenak sinatzen ditugu horiekin eta domeinuaren zaintza, kudeaketa eta sustapen lanak egiten ditugu”, esan du Josu Waliño zuzendariak euren egitekoaz. Era berean, euskarak sarean eta ingurune digitalean presentzia handiagoa izateko proiektuak ere sustatzen dituzte Elgoibartik. Euskadi Irratian, esaterako, irratsaio bat du PuntuEUS fundazioak, eta blog bat ere badute. Era berean, gaztetxoek webguneak euskaraz sortzeko lehiaketa ere sortua dute, Kaixomundua.eus, eta aurten, EHUrekin, Aldundiarekin eta Danobaten laguntzarekin, Gladys Saria lehiaketa ere jarriko dute martxan, ingurune digitalean emakumeek egiten duten lana saritzeko eta aintzatesteko.

 

2021 09 17 Bulegoan PuntuEUS elgoibar arg irati ayerza

2021 09 17 PuntuEUS elgoibar bulegoa kultur etxea errep barren

2021 09 17 PuntuEUS elgoibar langileak errep barren

 

 

Elgoibarko Izarra

elgoibarkoizarra-logoa-irudia

Gida komertziala

Gida komertziala 2018

Bideoak

Barren astekaria

ePosta harpidetza