Hiru ardatz izango ditu dinamikak. Batetik, gutun bana bidaliko diete Euskal Herriko administrazio nagusiei, euskalduntze prozesuaren normalizazioan pausoak emateko garaia dela gogoraraziz. Euskalduntze mugimenduak nolako baldintzak izan beharko lituzkeen jasoko dute gutunean, eta edukiari buruz zehaztasun handirik eman ez badute ere, duela 55 urte Rikardo Arregi euskaltzale eta kazetariak Euskaltzaindiari helarazi zion gutunaren oinarri bera izango duela aurreratu dute. Eragileekin ere lan egingo dute, eta akuilu-lana egiteko eskatuko diete nork bere eremuan, uste dutelako eragileek paper garrantzitsua jokatzen dutela. Bestetik, herritarren babesa eta ekarpena ere eskatuko dute, jendeartearen arnasa ere ezinbestekoa dutelako. Horretarako, Bultza Euskaltegiak! ekitaldiak ere antolatuko dituzte Euskal Herriko hainbat herritan martxoaren 28rako, Korrika bukatuko zen egunerako, eta diru bilketa kanpaina ere hasiko dute martxoaren amaiera aldera. Korrika atzeratzeak zuloa eragin du AEKren aurrekontuan, eta hasiera batean banku bidezko finantzaketaren bitartez eman diote erantzuna. Zorpetze horri ere aurre egiten laguntzeko herritarren sostengua behar dute, baina. Ekarpenak AEKren webgunean egin daitezke, hainbat eratan.
- 12:00 Bertsolari batek hasiera emango dio ekitaldiari
- 12:01 Marrazkigile bat marrazkia egiten hasiko da
- 12:05 AEKren mezua irakurriko dute
- 12:10 Bertso-rapa
- 12:15 Euskal Herrian Euskaraz kantua abestuko dute elkarrekin
- 12:20 Talde argazkia aterako dute (jendea ezingo da dagoen tokitik mugitu argazkirako)
- 12:25 Bertsolariaren agurra
- 12:30 Eskerrak ematea