Elgoibarko merkatari-ostalarien eta herritarren artean ematen diren ahozko harremanetan euskararen erabilera sustatzea da Gurean euskaraz kanpainaren helburua. Kanpainan parte hartuko duten merkatari eta ostalariek haiekin euskaraz egiteko gonbita egingo diete elgoibartarrei.
Hala, euskaraz egin edota eskatzen duten bezeroen artean 10 euroko 30 erosketa-txartel zozketatuko dira. Zozketa ekainaren 17an izango da eta erosketa-txartelak kanpainan parte hartzen duten establezimenduetan gastatzeko izango dira.
Herriko 44 establezimenduk parte hartuko dute kanpainan. Gurean euskaraz ikurra izango dute denek, bezeroak euskaraz egitera gonbidatzen dituztela jakiteko. Ostalari edo merkatari bakoitzak rol bat aukeratuko du. Ahobizi txartela daramanak paparrean, euskaraz egingo die bezeroei (gaztelaniara pasako da, bezeroak ez duela ulertzen ikusten badu). Belarriprest txartela daraman merkatari-ostalariak, berriz, berari euskaraz egiteko gonbita egiten dio bezeroari, ulertzen duela erakutsiz, nahiz eta belarriprest batzuk ezingo duten euskaraz erantzun.
Amaia Lasagabaster Gurean Baiko koordinatzaileak eta parte hartuko duen lagun batek, Ainhoa Etxeberriak (Surya belar-denda) azaldu dituzte aste honetako BARRENen, Gurean euskaraz kanpainari buruzko xehetasunak.
Guztira 112 merkatari eta ostalarik parte hartuko dute kanpainan; 37 ahobizi izango dira, eta 75 belarriprest. Hauek dira kanpainan parte hartuko duten establezimenduak.
