Euskararen aldeko oihuekin eta musikarekin girotu dituzte Elgoibarko kaleak Herri Eskolako ikasle, irakasle eta gurasoek gaur goizean. Arratsaldean Jalgi hadi plazara! jaialdiak hartuko ditu herriko kaleak eta plazak.
Nirekin, zurekin Euskaraz elkarrekin leloa zeraman pankartarekin gurutzatu dituzte herriko kaleak Elgoibarko Herri Eskolakoek. Kalejiraren ostean, Maalako parkean batu dira guztiak eta Iban Zangitu DJaren erritmora jardun dute kantuan eta dantzan.
• Jalgi hadi plazara! jaialdia, 19:00etan
Euskararen Nazioarteko Egunaren harira Elgoibarko eta Mendaroko gainerako ikastetxeek ere egin dituzte hainbat ekitaldi, ikastetxe barruan. Elgoibarko ikastetxe guztiek hartuko dute parte Euskarak 365 taldeak gaur arratsalderako antolatu duen giza katean eta Plazera plazara ekitaldian.
