Agarre-Txiki baserrian jaio zen Julia Larrañaga eta Sahatzu-azpiko baserrira ezkondu zen gero Pedro Aranberri Arakistainekin, Itziarko Isasi baserriko semearekin. Bi seme eta alaba bat izan zituzten. Mendaroko Udalak herriko nagusiena omendu ohi du urtero herriko jaietan, eta aurten, omenaldia Santa Ana egunez egin zuten.
Amaia Agirre bertsolari eta gai-jartzaileak aurkeztu zuen omendua Goñati pilotalekuan egin zuten bertso saioan eta ondoren, Andoni Egañak eta Uxue Alberdik bertso bana kantatu zioten. Txalo artean hartu zuten mendaroarrek herriko laguna, eta Iñaki Arregi alkateak lore-sorta eman zion.
