Gune hau zigilatzearekin batera, zabortegia erabat itxi eta ingurumena berreskuratuko da; lehenengo gunea 2013an itxi zen. Orain zigilatuko den eremuan 2007 urte hasieran utzi zitzaion hondakinak isurtzeari. Debabarrena Mankomunitatetik jakinarazi dutenez, obraren helburua da zabortegia behin betiko ixtea eta ingurune naturala berreskuratzea. "Urruzunoko zabortegia zigilatu, itxi eta ingurumena berreskuratzeak amaiera ematen dio Debabarreneko hiri-hondakinen zabortegien aroari".
• Zigilatze prozesua
Obrak hasteko, eremuko sastrakak eta landare guztiak kenduko dituzte aste honetan. Ondoren, ezpondak profilatzeko lanak egingo dira, egitura berrian malda handiak saihesteko. Profil berriak lortu ondoren, geosintetikoak instalatuko dira. Horien funtzioa da hondakinak pilatzen diren eremura ura ez sartzea, lixibiatuak edo ur kutsatuak Aranbeltz errekara iritsi ez daitezen. Azkenik, 60cm buztin-lur eta 40cm lur ipiniko dira geosintetikoen gainean, belarra ereiteko.
Obrak Viuda de Sainz eta Urdinberri enpresek osatzen duten ABEEari esleitu zaizkio, 1.083.518 euroko prezioan. Obra zuzendaritza Hirgintza enpresari esleitu zaio 59.371,68 euroko prezioan, eta geosintetikoen kontrola Cantabriako Unibertsitateari, 47.163,14 euroko prezioan. Zabortegian izan dira gaur Lanak egingo dituzten hirigintza enpresako obra zuzendariak, Viuda de Sainz eta Urdinberri enpresek osatzen duten ABEE-ko ordezkaria eta Debabarrena Mankomunitateko gerentea (goiko irudian).
• Eremua prestatzeko aurretiazko lanak
Urtarrilean amaitu ziren behin betiko zigilatzearen aurreko lanak, eta zabortegia behar bezala ixteko "kontrol-neurri guztiak bermatu eta gainditu ondoren", obrak kontratatzeko prozesua hasi zen.
Mankomunitatetik zehaztu dutenez, Lurzoruaren Txostena, kontrol topografikoa, lurpeko uren eta lixibiatuen analisiak eta gasen analisia egin dira, besteak beste, Eusko Jaurlaritzak Urruzunoko itxiera eta ingurumen-berreskuratze lanei 2016an emandako Ingurumen Baimen Bateratuan ezarritakoari jarraituz.
• Behin betiko itxi ondorengo erabilera
Behin obra amaituta, eremua Mankomunitatearen materialen biltegi gisa erabili nahi da: edukiontziak, makina-garbitzaileak, etab. Proiektuak hormigoizko zolata bat eraikitzean datza, kamioiak eta furgonetak eroso moldatzeko eta aipatutako logistika-lanak egin ahal izateko.
∞Lotura duten albisteak:
- Urruzunoko zabortegia erabat ixteko lanak maiatzean hasiko dituzte (2021-01-14)
- Urruzunoko zabortegiko lurpeko gasak aztertzeko bost putzu zulatu ditu Mankomunitateak (2020-10-02)
- Urruzunoko zabortegia erabat zigilatzeko aurrelanak hasi dituzte (2020-07-16)
- Urruzunoko zabortegia zegoen lekuan lindano maila neurtzeko eskatu du EH Bilduk, eta Mankomunitateak dio ez dagoela alarmarik sortzeko beharrik (2020-02-11)