Maalako parkean ibai aldean dauden barandak egokitzeko neurriak Haurren Kontseiluak Eskolako Agenda 21en barruan egindako eskaera bati erantzuten diola azaldu dute Elgoibarko Udaleko arduradunek. "Herri Eskolako 5. ikasturteko ikasleekin landu zen ekimena iaz. Zokalo baten funtzioa betetzen dute. Zokalo horrek hondakinak jasotzen ditu errekan amaitu aurretik", adierazi dute.
Helburua ingurumenaren zaintza bermatzea dela nabarmendu dute, hondakinen kutsadura murrizteko beharrezko neurriak hartuta. "Gainera, Maalako parkean jarritakoek balio izango dute parkearen inguruan haurrak ibaira ematen duen baranda eskalatzen saia ez daitezen".
Udalak 5.808 euro (BEZ gabe) bideratu ditu Maalako barandak egokitzeko lanetara.
Elgoibarko Elkarrekin Podemosek bere poza adierazi du, Maalan eginiko egokitzapenen harira. "Pozten gara, azkenean, Elgoibarko Udalak gure taldeak 2019ko urrian egindako eskaera bati erantzun izanaz, herritarren kexa batzuen bidez iritsi baitzitzaigun. Jendea beti erdigunean", esan dute sare sozialen bidez, egin zuten eskaera argitaratuta.
∞Lotura duten albisteak:
- Burdin sarea jarri dute ibai ertzeko barandetan, plastikoa ibaira eror ez dadin (2021-05-07)
- Deba ibaiko zentral elektrikoetako presetan pilatzen den zaborra kudeatzeko sistema berria ipintzearen aldeko mozioa onartu dute (2021-05-04)
- Plastikoek eragindako kutsaduraren kontra egotetik egitera (2020-01-16)
- Basarteko hainbat gune garbituko dituzte Herri Eskolako ikasleek (2019-12-05)