75. urteurrena ospatzeko bederatzi irteeraz osatutako zikloa antolatu du Morkaiko Mendizale Elkarteak. Anfibioak ezagutzeko gauez eginiko irteera izan zen aurrenekoa, joan den apirilaren 13an. Izarraitzera joan ziren eta anfibioak ikusteko gau heze ezin hobea egin zien. Hala, ikustea espero zuten sei espezieetatik bost ikusi zituzten: arrabioa, uhandre palmatua, uhandre marmolairea, apo arrunta eta txantxikua. Asier Sarasuak Youtubera igotako honako bideoan ikus dezakezue irteeraren laburpena.
• Narrastiak ezagutzera
Bigarren irteeran narrastiak izango dira protagonista. Lehenengoan moduan, Ander Izagirre "Naturzalia" izango da gidaria. 9:00etan elkartuko dira zapatuan, Guass dantzalekua egon zeneko aparkalekuan. Izena emateko morkaiko@morkaiko.eus helbidera idatzi behar da edo 636 994 798 telefono zenbakira deitu. Adin guztetako herritarrentzako irteera dela zehaztu dute Morkaikotik. Bazkaria norberak eraman beharko du. Aranzadi zientzia elkartearekin elkarlanean eta Elgoibarko Udalaren eta Udal Kirol Patronatuaren babesarekin antolatu dute irteera.
Hurrengo irteera Izar Gaua izango da, ekainaren 1ean.
