Errekonozimenduak eta sariak pilatzen jarraitzen du Elgoibarko mausitxa gaztandegiak. Erresuma Batuan egin den “Great Taste 2016” txapelketan munduko 50 elikagai onenen artean sailkatzea lortu zuen abuztuan, eta azken egunetan bi sari gehiago eskuratu ditu, bigarren postuak biak.
Lehena, Legazpiko Artzain Egunaren baitan jokatu zuten Gipuzkoako 32. Artzain Gazta Lehiaketan, domekan (irailak 4). Gaur ere lehen saria irabazteko atarian gelditu da Euskal Herrian egiten den gazta lehiaketa garrantzitsu bezain entzutetsuan, Ordizian. Joseba Intsausti Mujika artzain ordiziarrak jantzi du txapela eta Mausitxakoen atzetik Olaberriko Aizpea geratu da hirugarren, laugarren Eulateko (Nafarroa) Ricardo Remiro eta bosgarren Irurain-Gaunako Audikana anaiak gaztandegia.
Mausitxak hiru alditan irabazi du Ordiziako txapelketa (2005, 2007 eta 2009) eta, horrez gainera, 2005etik 2014ra artean Ordiziako gazta txapelketa irabazi zuten gaztagileek parte hartu zuten Ordizia Txapeldun Saria ere irabazi zuen 2014an. Urte hartan, gaur moduan, bigarren saria eskuratu zuen Mausitxak Ordizian.
•Txillarrerentzat saria barazkietan
Aldiz, Elgoibarko Txillarre baserriko Peio Rubiok aurkeztutako produktuek (ondorengo argazkian) lehen saria lortu dute Barazki Lehiaketan.
