Morkaiko mendi taldearen logotipo berria aukeratzeko lehiaketan parte hartu nahi dutenek martxoaren 7rako bidali beharko dituzte lanak morkaiko@morkaiko.eus helbidera. Morkaiko Mendizale Elkartea edo Morkaiko M.E. berbak agertu beharko dira logotipoan eta JPG formatuan bidali behar dira lanak.
• Bozketa Morkaikoren Egunean
Morkaikoko zuzendaritzak izendatutako epaile talde batek aukeratuko ditu jasotakoen artean zein diren finalera pasako diren lanak. Gero, Morkaikoren Egunean, maiatzaren 12an, Morkaikoko bazkideek (16 urtetik gorakoek) finalera pasa diren logotipoetatik gustukoena bozkatzeko aukera izango dute.
Logotipo irabazlearen egileak 150 euroko erosketa txartela jasoko du saritzat, Morkaikorekin hitzarmenak dituzten dendetan gastatzeko. Lehiaketari buruzko oinarriak hemen.
• 75 urteko ibilbidearen erakusketa
1943an sortu zuten Morkaiko Mendizale Elkartea eta mendizaletasuna sustatzen eman dituzten 75 urteotan gauzak nola aldatu diren gogoeta egin dute Morkaikoko gaur egungo arduradunek, "bai Morkaikon gauzak egiteko eran, eta baita mendira joateko edo eta mendia sentitzeko eran ere". Aldaketa horiek guztiak bistaratzeko asmoz, 75 urtetako ibilbidea erakusketa batean laburbildu nahi dute. Horretarako, elkartearekin edota mendizaletasunakin lotura edo harremana duten bitxikeriak jaso nahi dituzte eta herritarrei horien berri emateko eskatu diete. "Bitxikeriak era askotarikoak izan daitezke; batzuk aipatzeagatik: irteeren berri emateko erabiltzen ziren kartelak edo eskuorriak, egutegiak, beste sasoi batzuetako mendiko jantziak eta materiala… Argazkiak eta bideoak ere eskertuko ditugu. Bereziki bideoak", azaldu dute. Horiek guztiak elkarteak Errosario kalean duen egoitzara eramateko eskatu dute. Nahi izanez gero, 636 994 798 telefonora ere dei egin daiteke.