Gipuzkoako Kopa ere IMHren zakura

elgoibarren.net 2009ko eka. 2a, 10:03

Gipuzkoako Kopa irabaziz, denboraldi apartari amaiera ezin hobea eman dio IMH eskubaloi taldeak. Lorea Gabilondok entrenatutako jokalariek Euskadiko Txapelketa eta Gipuzkoako Kopa Txapelketa irabazi dituzte aurten eta Espainiako Txapelketan ere onenen pare daudela erakutsi zuten. IMH taldea kanporatu zuen taldeak, Valladolideko Aula Culturalek, irabazi du Espainiako txapelketa eta horrek balore handiagoa ematen dio, gainera, IMHren parte hartzeari. Are gehiago puzelarren aurka gol bakarreko aldeaz galdu izanak.

Kadete mailako Gipuzkoako Kopako finala Mutrikun jokatu zen joan den domekan (maiatzak 31). Elgoibarko IMH eta Zarautz taldeak ailegatu ziren finalera eta 28-24 izan zen azken emaitza elgoibartarren alde. Garaipen honi aurrez lortutako Euskadiko Txapelketa eta Valladoliden jokatutako Espainiako Txapelketako sektorean eginiko lan ona gehituz gero, denboraldi borobila osatu dute IMHko neskek.

•Tecnifuelle taldeak ere Kopa irabazi du

Tecnifuelleko jokalariak pozik koparekin.

Sanlo Eskubaloi Kirol Taldeko talderik aipagarriena izan da, beharbada, IMH aurtengo denboraldian, baina gainontzeko taldeek ere maila bikaina erakutsi dute. Senior mailako Tecnifuelleko neskek, esaterako, Gipuzkoako Kopa eskuratu dute. Zumaiako Lubaki kiroldegian, Andoaingo Leitzaranen aurka jokatutako norgehiagokan lortu zuten titulua elgoibartarrek. Azken minutura arte ez zen erabaki irabazlea. Elgoibartarren atezainak penalti bat gelditu zuen, eta berdinduta amaitu zen partida. Ondorioz, bost minutu luzatu behar izan zuten norgehiagoka. Parekatuta jarraitu zuen lehiak, eta azkenean, gol bateko tartearekin irabazi zuten elgoibartarrek: 25-24 emaitzarekin.

Bestalde, Elgoibarko Aterpe taldeko neskak ere Gipuzkoako txapeldun geratu dira infantilen mailan. Orain Euskadiko Kopa dute aurretik.

•Denboraldi amaierako afaria
Urtero legez, denboraldi amaierako afaria egingo dute Sanloko jokalari, entrenatzaile, zuzendaritzako kide, guraso eta babesleek. Ekainaren 20an egongo dute Harzubi jatetxean. Badute zer ospatua.

Kirola Elgoibar