Kultur ekintzaz beteriko asteburua

•Aiastia-San Migelgo jaiak

Gaur (irailak 25) hasiko dira Aiastia-San Migelgo jaiak. 18:30etan izango da kanpai jotzea, eta ondoren, 20:00ak aldera, trikiti-bertso kalejira egingo dute, Ekaitz eta Arantza trikitilariekin eta Maialen Lujanbio eta Xabi Paia bertsolariekin. Bertso afaria izango da, hala ere, jaietako lehenengo eguneko ekintza nagusia. 21:00etan batuko dira afaritarako, eta ondoren, disko festa izango da goizaldera arte, striptease eta guzti.
Zapatuan, artzai txakur txapelketa jokatuko da, Euskal Herriko arraza libreko finala hain zuzen ere. Gauean, berriz, Borja Uzuriagaren oroimenez ekitaldi bat egingo dute Haritz Euskal Dantzari Taldeko kideek, eta ondoren, Erromeria eta bolo txapelketen tartea izango da. Domekan, berriz, korrika saioa eta idi-demak izango dira eguneko ekitaldi nagusiak. 12:00etan hasiko da San Migelgo igoera, eta 17:00etan, idi demak. (Ondoko taulan klik eginez ikus dezakezue egitarau osoa).

•Plaza Txikiaren Astea

Plaza Txikiaren bueltan jaio, bizi eta hazitakoek, Udalaren laguntzarekin antolatu duten Plaza Txikiaren Asteko ospakizunak zapatu honetan (irailak 25) hasiko dira, Mingorance ferietako saltzaile berritxuaren jardunaldiarekin. Eguerdiko 12:00etan izango da, Plaza Txikian, hileko azken zapatuko feriaren barruan, orain dela urte batzuk izaten zen modu bertsuan. Alabaina, Plaza Txikiko erretratu zaharren erakusketa izango da Plaza Txikiko Asteko ekintza nagusia. Astelehenean zabalduko dute erakusketa Kultur Etxean. (Ondoko taulan klik eginez ikus dezakezue egitarau osoa).

•Moto zaleen kontzentrazioa
  Azkeneko urteotako ohiturari jarraituz, moto zaleen kontzentrazioa antolatu du Skull’s Riders taldeak astebururako. Zapatuan (12:00ak inguruan) hasiko dituzte ospakizunak, Borja Uzuriaga errepide istripuan hildako sanmigeldarrari egingo dioten omenaldiarekin. (Ondoko taulan klik eginez ikus dezakezue Skull Riders taldeak astebururako antolatu duen egitarau osoa).

• Informazio gehiago hemen

•Bilboko Udal Musika Banda
  Elgoibarko Udal Musika Bandaren 125. urteurreneko ospakizunekin bat eginez, Bilboko Udalaren Musika Bandak kontzertua eskainiko du, zapatu honetan (irailak 25), San Bartolome parrokian. Informazio gehiago hemen


•Monologoak Herriko Antzokian
  Lojantzi tabernak antolatuta monologo saioa izango da Herriko Antzokian. Miguel Lago eta Quique Macias saiatuko dira oraingoan umorezko bakarrizketen bitartez Herriko Antzokira hurbiltzen diren ikusleen barreak ateratzen.

•Piraten jaia
  Atxutxiamaika aisialdi taldeak Piraten jaia antolatu du zapaturako. 11:30etik aurrera umeentzako tailerrak, ipuinak eta jolasak egingo dituzte Plaza Handian. Antolatzaileek pirataz jantzita joateko deia egin diete umeei.