Bigarren Mailara igo da Concepto Egile

elgoibarren.net 2013ko mai. 25a, 21:26

6-4 irabazi du Concepto Egile areto futbol taldeak Bigarren Mailara igotzeko kanporaketako itzulerako partidua, gaur arratsaldean, Olaizaga kiroldegian. Bartzelonako Montcada taldea baino gehiago izan dira elgoibartarrak, bigarrengoz (joaneko partidan 2-3ko emaitzarekin irabazi zuten). Honenbestez, Bigarren Mailan jokatzeko eskubidea irabazi du Conceptok kantxan. Alabaina, ekonomiak izango du azken hitza, ikusteko dago-eta Debabarrena kluba gai izango den maila bat gorago jokatzeko aurrekontua osatzeko. Igoera lortu osteko ospakizunak ikus ditzakezue goiko bideoan. (argazkiak eta bideoa dauzka)

Olaizaga kiroldegiko harmailak jendez beteta zeudela jokatu dute Concepto Egilek eta Montcada taldeek Bigarren Mailara igotzeko kanporaketako itzulerako partidua. Bartzelonatik gol bateko aldea ekarri zuten etxekoek, baina errentari eustera baino aldea handitzera atera dira lehen minututik. Hala, Buitrek sartu du Conceptokoen lehen gola. Markagailua berdintzea lortu du Montcadak, baina hurrengo hiru golak errenkadan sartu ditu Debabarrenako taldeak: Koldok, Raulek eta Buitrek sartu dituzte etxekoen gola.

1706637542974 Bigarren Mailara igo da Concepto Egile

Emaitza horrekin (4-1) iritsi dira atsedenaldira. Bigarren zatia ezin hobeto hasi da etxekoentzat, eta David Garrido kapitainak sartu du bosgarren gola. Montcadak gehiago arriskatu behar izan du eta hiru gol sartu dituzten arren, beste bat ere jaso dute. Uneoro kontrolpean izan dute partida etxekoek eta garaipen handia lortu dute.

•Gehituz jaia
Iaz egin zuten moduan, Gehituz jaia antolatu du aurten ere Concepto Egilek. Ekainaren 7tik 9ra bitartean karpa jarriko dute Maalako parkean, eta hainbat ekintza izango dira bertan. Tartean, ajedrez txapelketa antolatu dute, eta interesatuek ekainaren 3rako eman beharko dute izena, delegado@ debabarrenafs.org helbidera idatzita.

•ARGAZKIAK: (guztiak Picasan)

Kirola Elgoibar