Maite Maiora, lehen emakume euskalduna Aizkorriko maratoian

elgoibarren.net 2013ko mai. 27a, 13:14
Deskargatu Info Ahotsak :
es en fr

Denboraldi biribila ari da egiten Maite Maiora. Domekan, bosgarren egin zuen Aizkorriko mendi maratoian eta lehen emakume euskalduna izan zen. Emakumezkorik azkarrena izan zen Emilie Forsberg suediarrak baino bederatzi minutu eta erdi gehiago behar izan zituen mendaroarrak 42 kilometroak osatzeko, 4.57:42ko denbora eginda. Arkaitz Irureta elgoibartarrak ere hartu zuen parte proban eta bideo bat osatu du burugainean eraman zuen kamerako irudiekin eta argazkiekin.

 

 Lasterketaren amaieran pozik zegoen Maiora egindako “lasterketa handiarekin” eta baita egindako markarekin ere. Ez da gutxiagorako, mundu mailako puntako atletek bakarrik hartu zioten-eta aurrea korrikalari mendaroarrari. Mendi lasterketetako egungo txapelduna, Emilie Forsberg suediarra izan zen azkarrena emakumezkoetan, 4.48:12ko denbora eginda; harengandik minutu eta 43 segundora sartu zen helmugan Nuria Picas. Kataluniarrak, atzetik aurrera eginez, helmuga marra bertan kendu zion bigarren postua Stevie Kremer estatubatuarrari (4.58:49). Laugarren postuan Aizkorriko maratoia behin baino gehiagotan irabazi duen Emanuela Brizio sailkatu zen, 4.56:10 denbora eginda. Italiarrarengandik minutu eta 32 segundora sartu zen helmugan Maite Maiora (4.57:42). Honenbestez, lehen emakume euskalduna izan zen helmugan. Emakumezkoen kategorian lasterketa irabazteko faborito nagusia zen Oihana Kortazar elgetarrak {2012ko proba berak irabazi zuen}, bertan behera laga zuen proba. 

Emakumezkoen podiuma.

Maite Maiora. Arg: Unai Agote.
 
•Kilian Jorneten seigarren garaipena
 Gizonezkoetan, Kilian Jornetek seigarren aldiz irabazi zuen Zegama-Aizkorri. 3 ordu eta 54 minutu behar izan du ibilbide guztia bukatzeko, eta haren ondoren sartu zen helmugan Luis Alberto Hernando, 12 segundora. {Hernandok Mendaroko mendi lasterketaren estreinako edizioa irabazi zuen, 2011n}. Podiuma Tadei Pivk-ek osatu zuen.
•Gure ordezkarien emaitzak

Iñigo Lariz. Arg. Julen Ansola.

Gure ordezkariei dagokionez, Manolo Ramos elgoibartarrak 182. postuan amaitu zuen proba, 5.34:33 denbora eginda. Arkaitz Irureta 311. postuan (6.25:38) sailkatu zen, gizonezkoen sailkapeneran. Gotzon Zulaika mendaroarra, berriz, 337. postuan, 6.42:48 denbora eginda. Aitor Ibabe 373. postuan (7.13:09), eta Jon Peli Uru¡guen 379. postuan sailkatu ziren (7.21:55). Iñigo Larizek ere hartu zuen parte, baina “gorputzak ezetz esan” eta Aizkorrira “hustuta eta mareatuta” ailegatu ostean, bertan behera laga zuen proba. 

BIDEOA: Arkaitz Iruretak honako bideoa osatu du Zegama Aizkorri mendi maratoian jasotako irudiekin.

 
 
 
Kirola Elgoibar