Plan estrategikoa eta zuzendaritza talde berria onartu ditu Elgoibarko Izarrako bazkideen batzarrak

elgoibarren.net 2014ko mai. 8a, 12:49

Atzo (maiatzak 7) egin zuten Elgoibarko Izarrako bazkideen batzarra Kultur Etxeko hitzaldi gelan, urte hasierako batzarrean zintzilik geratu ziren gaiak erabakitzeko. Datozen hiru urteetako plan estrategikoaren barruan, elkartearen antolaketa eredua geratu zen onartzeko urtarrilean, eta bazkideen oniritzia jaso zuen. Era berean, 2013ko memoria ekonomikoa eta zuzendaritza talde berria onartu zituzten bazkideek.

1706636796615 Plan estrategikoa eta zuzendaritza talde berria onartu ditu Elgoibarko Izarrako bazkid

2013ko diru kontuetan, 10.000 euroko galera aurkeztu zuen elkarteko kudeatzaileak. Elkarteak ekonomikoki “urte zailak” bizi dituela azaldu zuen, baina aurrera begira autofinantzaketa handitzeko ahalegina egingo dutela nabarmendu zuen. Bazkideek aldeko botoa eman zioten memoria ekonomikoari.

Azkenik, bi urtez lanean jardun duen zuzendaritzari eskerrak eman zizkieten, eta zuzendaritza talde berria aurkeztu zuten. Bazkide profesionalek eta bazkide militanteek osatuko dute zuzendaritza batzordea. Presidente karguan Iñaki Kondek jarraituko du, egin ahalak egin arren, ez dutelako hura ordezkatzeko hautagairik lortu, oraingoz.

Orain arteko zuzendaritza batzordea. Goian, ezkerretik hasita: Ane Odria, Ainhoa Andonegi, Iñaki Konde, Imanol Larrañaga, Amaia Lasagabaster, Urrategi Altzibar, Sebas Larrañaga, Naiara Martin eta Lore Laspiur.

Zuzendaritza batzorde berria: Junkal Txurruka, Ainhoa Andonegi, Imanol Larrañaga, Julen Irizar, Amaia Lasagabaster, Iñaki Konde eta Naiara Martin. Aitor Lauzirika eta Asier Arzamendi falta dira.

Euskara Elgoibar