Nazioarteko zirkuituaren barruan dago proba bat eta indarra hartzen hasi da bestea, baina gutxi falta izan da batean zein bestean garaile berberak izateko: Maite Maiora eta Luis Alberto Hernando gailendu ziren Kilimon Trail mendi lasterketaren azken edizioan eta, txapeldunorde eta txapeldun izan dira, hurrenez hurren, Transvulcania proba entzutetsuan. Hernandok, gainera, espezialitateko dominatzaile handiena den Kilian Jornet hartu du mendean Kanarietan.
•Elitean lekua eginez
Ez zuten pronostikoetan hutsik egin. Lehen parte hartzea zuen arren, lasterketa bikaina egin zuen Maiorak eta zortzi ordu eta 20 minutuan amaitu zuen 73 kilometroko ultra trail proba. Anna Frost irabazleak baino 10 minutu gehiago behar izan zituen. Uxue Fraile euskalduna sailkatu zen hirugarren postuan (8:48).
Lasterketa gogorra izan zela azaldu du Maite Maiorak, batez ere buruarentzat, “ez bainekien nire gorputzak nola erantzungo zuen horrenbeste kilometroko proba batean”. Bistan da zalantzak uxatu dituela eta froga gainditu duela. “Oso pozik nago eta osorik gainera”, adierazi du Kanarietatik bueltan. Pozik egin duen markarekin eta munduko onenekin lehiatzeko aukera izan duelako. Era berean, Kanarietan jaso duen tratua eta babesa nabarmendu ditu. “Ibilbidea izugarri ederra zen eta irteera ikusgarria, gauez eta frontalekin ekin genion-eta probari. Gero ibilbide guztian zehar jaso genituen ikusleen animuak”.