Mendizaleen harrobia sendo dagoela utzi du agerian Morkaikoren Egunak

elgoibarren.net 2014ko mai. 12a, 14:41
Deskargatu Info Ahotsak :

Jendetza batu zuen zapatuan Morkaikoren Egunak. 280 lagunek egin zuten Elgoibarko Itzulia eta Itzulitxoak partaidetza marka guztiak hautsi zituen, 325 bat lagunek (ume eta guraso) parte hartu zuten-eta mendi bueltan. (argazkiak eta bideoa dauzka)

 600 lagunen langa ere gainditu du aurten Morkaikoren Egunak. Urtetik urtera gora egin du partaideen kopuruak eta aurten ere eskuak bete lan izan dituzte mendi taldeko kideek.

Finalista eguneko dominak jaso zituzten umeek Kalegoen plazan.

Ohi duten legez, eguna argitu aurretik hasi zuten mendizaleek Morkaikoren Eguna. Goizaldeko 6:00etan 280 lagun batu ziren Kalegoen plazan, Elgoibar mendiz mendi inguratzeko prest. Elgoibarko Itzulian parte hartu zuten lagunek ez zuten eguraldiaren aitzakiarik izan, eta paisaia ederrez gozatzeko aukera izan zuten itzuliak dituen 38 kilometroko ibilbidean. Morkaiko menditik eta Iruiturritik pasa zirenean, gainera, Elgoibarko Itzulitxoa egiten ziharduten lagunekin gurutzatzeko aukera izan zuten Elgoibarko Itzuliaren azken txanpa egiten ari ziren hainbat lagunek.
Inoiz baino lagun gehiagok parte hartu du aurten umeen eta gurasoen artean mendizaletasuna sustatzeko helburua duen Itzulitxoan. Ume horietako askok, gainera, urtean zehar igotako mendiengatik errekonozimendua jaso zuten gero plazan, Finalista Eguneko domina banaketa ekitaldian (goiko argazkian). Mendizale elgoibartarrak saritu ostean, parrokiako arkupeetan bazkaldu zuten ume zein nagusiek.
•ARGAZKIAK:
 

 
Gizartea Elgoibar