Atabal elkarteak jakinarazi duenez, hamalau lan aurkeztu dira aurten kartel lehiaketara. Epaimahaikideen iritziz, Ander Aranbarrik aurkeztutako lanak merezi zuen lehen saria (300 euro). Atabal elkarteko Juan Carlos Arrietak jakinarazi duenez, danborrada hasi aurretik jasoko du saria Kalegoen plazan. Ekainaren 14an egingo da aurten nagusien danborrada Trinitate jaien barruan, 23:30ean hasita.
Lehen saria jaso duen kartelaren egileak azaldu duenez, azterketetarako ikasten ari zela jaso zuen lehiaketa irabazi zuenaren deia. Izan ere, arkitekturako laugarren ikasturtea egiten ari da Aranbarri Donostian, EHUn. Honakoa kartel lehiaketa batera aurkeztu den aurreneko aldia izan dela aitortu du.
•Danborradarako kartel lehiaketako irabazleak, urtez urte:
- 2013 Nerea Oteiza
- 2012 -ez zen lehiaketarik egin-
- 2011 Marina Gabiola
- 2010 Jose Manuel Esnal
- 2009 Jabi Barrenetxea
- 2008 Jose Manuel Esnal
- 2007 Jose Manuel Esnal
- 2006 Nestor Perez