Lauko Elgoibar taldeak Zilarrezko Ohorezko mailan jokatu du estreinakoz aurten, sekula jokatu duten mailarik gorenean, alegia. Hamasei jardunalditan zazpi partida irabazi eta bederatzi galdu ostean, sailkapeneko seigarren postuan amaitu zuten Liga txapelketa, eta honenbestez, mailari eusteko helburua lortu zuten. Denboraldia, baina, ez zen hor amaitu.
Liga amaitu eta gero Gipuzkoako Kopa jokatu du Laukok, eta finalera ailegatzea lortu zuen. Finala Zumaiako Lubaki kiroldegian jokatu zuten, joan den zapatuan (maiatzak 24), Lauko Elgoibarrek eta Bera-Berak. Elgoibartarrak nagusi izan ziren eta 33-16 irabazi zieten donostiarrei.
•Entrenatzailearen agurra
Eskola kiroleko gaztetxoak entrenatzen hasi zen Igor Lizarralde 16 bat urterekin, eta orduan lotu zitzaion eskubaloiari. Euskadi mailako entrenatzaile titulua atera eta Sanlo eskubaloi klubean sartu zen. Hainbat eta hainbat talde entrenatu ditu ordutik, eta azken hiru urteetan senior nesken taldeko entrenatzailea izan da. Ohorezko Zilarrezko Mailara igotzea lortu zuten iaz, eta estreinakoz jokatu dute aurten maila horretan. “Iazko lorpenaren ostean, lasai erretiratu naiteke” adierazi zuen Lizarraldek BARREN aldizkariari joan den martxoan eskaini zion elkarrizketan. Berba horiek esan eta gutxira jakinarazi du entrenatzaile izateari lagatzeko erabakia.