Mintxeta atletismo taldekoen indar erakustaldia Euskadiko Atletismo txapelketan

Gasteizen, Mendizorrotzako atletismo pistan, jokatu zuten Eskolarteko Euskadiko Atletismo Txapelketa joan den maiatzaren 24an. Mintxeta Atletismo Taldeko hiru kidek parte hartu zuten txapelketan eta ezin hobeto aritu ziren hirurak.

Martin Hernandezek Jabalina jaurtiketan hartu zuen parte eta 36 metro eta 82 zentimetroko jaurtiketak eman zion urrea, egin zituen bost jaurtiketetako aurrenekoak, alegia. Azken jaurtiketan ere 36 metrotik pasa jaurti zuen 500 gramoko pisua zuen jabalina. Euken Maiz sailkatu zen bigarren postuan 32,05 metroko jaurtiketa eginda. Ondoko argazkian lehen hiru sailkatuak podiumean. (ikus sailkapena)

Pisu jaurtiketako proban Johan Rodriguez elgoibartarra izan zen nagusi. Lehen jaurtiketa baliogabetu egin zioten arren, bigarrengoan 13 metro eta 45 zentimetroraino jaurti zuen hiru kiloko bola astuna. Bigarren postuan sailkatu zen Aiert Azkaratek 11,73ko marka lortu zuen.

Azkenik 150 metroko lasterketa jokatu zuen Eider Iglesiasek eta bera izan zen azkarrena, 19´93´´denborarekin. Abigail Hortiguela (20´07´´) eta Garazi Garmendia (20´32´´) sailkatu ziren bigarren eta hirugarren postuetan, hurrenez hurren. Iglesiasek gainera, 4x80 metroko erreleboetako proban hartu zuen parte Gipuzkoako selekzioarekin, eta urrezko domina eskuratu zuten. Martin Hernandezek ere parte hartu zuen erreleboetako proban, honek ere Gipuzkoa ordezkatuz, eta bigarren postuan sailkatu ziren.