EHBilduk ezinbestekotzat jotzen du udalaren kultura politika zehaztea

elgoibarren.net 2014ko eka. 26a, 15:43
Deskargatu Info Ahotsak :

Elgoibarko kultur guneak berrantolatzeko parte-hartze prozesua jarri du martxan Udalak, eta horren barruan, Aita Agirreko kulturgunea egokitzeko asmoa azaldu du. EHBilduren ustez, elgoibartarrek behar duten kulturgunea da Aita Agirre, eta horregatik sartu omen zuten 2011ko udal hauteskundeetarako euren herri programan. “Pozik” hartu du koalizioak EAJk proposamen horrekin bat egin izana, baina Udal Gobernuak aurkeztutako proposamenak hainbat kezka sortu dizkie, eta ezinbestekotzat jo dute kultura politika zehaztea, Aita Agirreko kulturgunea behar bezala garatu dadin.

 
 Besteak beste, kultura alorrean dituzten lehentasunak eta zein kultur eredu sustatu nahi duten zehazteko eskatu dio EH Bilduk Elgoibarko Udalari, eta baita sorkuntzak izango duen lekua zehazteko ere. Baldintza horiek zehaztu gabe, kultur gunearen erabilera zehaztea ez dela posible uste du EHBilduk. "Pentsatu genezakeen ireki den prozesu parte hartzailearen helburuetako bat horixe dela, baina ez, ez da horrela. Prozesu parte hartzailearen helburu nagusia kultur eragileekin eraikinaren banaketa adostea da", adierazi dute.
 Horrez gain, prozesu parte-hartzailea mugaz josita dagoela adierazi dute, bereziki, hainbat kultur eragilek ez dutelako jaso prozesuan parte hartzeko deialdia. "Ordenantza onartu berriak horrela aurreikusi arren, deialdi zehatzaz gain ez da deialdi publiko orokorrik egin interesa duen eragile oro prozesura batzeko", salatu du koalizioak.

 Ideiak garbi eduki arte ezin dela lau milioi euroko inbertsio bat egin esan dute koalizioko kideek, eta prozesu honen gaineko hausnarketa egiteko eskatu dute.
 
 
 
 
 
Udala Elgoibar