Lekeitio Nazioarteko Kale Antzerki Jaialdiak 25 urte beteko ditu aurten,
eta, hori ospatzeko, Dantzaz konpainiarekin elkarlanean prestatutako
ikuskizuna estreinatuko du uztailaren 11n eta 12an: Itsaslaboa: txoriak,
zoroen itsasoa. Mikel Laboaren obra du oinarrian ikuskizunak, baina
baita itsasoa eta Lekeitio bera ere. Josu Mujika sortzaile eta
koreografo elgoibartarra arduratu da azkeneko hilabeteotan ikuskizuna
prestatzeaz. (bideoa dauka)
Josu Mujikak adierazi duenez, urte eta erdi eman du Laboaren musika entzuten, "probatzen", eta horren ondoren "hari musikal" bat prestatu du koreografia osatzeko. Iñaki Salvador, urteetan Laboaren kolaboratzaile estua izan zena, aholkulari lanetan aritu da, eta zuzendaritza artistikoaz, berriz, Adriana Pous arduratu da.
Uztailaren 11 eta 12an Isuntzako hondartzan estreinatuko dute 'Itsaslaboa: txoriak, zoroen itsasoa' ikuskizuna.
Ez da hau Lekeitioko Kale Antzerki Jaialdiak eta Dantzaz konpainiak elkarrekin lan egiten duten aurreneko aldia. Hain zuzen, 2011n, Joseba Sarrionandiaren obran oinarritutako lan bat estreinatu zuten: Naufragoak / Sarritsasoa. Josu Mujikak sortutako koreografiarekin, beste behin ere. Lan hark arrakasta handia izan zuen, eta orduz geroztik Euskal Herrian nahiz kanpoan eman dute. Elgoibarren ere iritsi zen. Kalegoen plazan eskaini zuten Mujikak sortutako Naufragoak ikuskizuna, iaz, San Bartolome bezperan. (iturria: berria)
