Santiago festak indarberrituta datoz Sigma auzora

 Sigma auzoko bizilagunek auzolanean berreskuratu eta txukundu dituzte auzoko hainbat gune, azken boladan. Besteak beste, Sigmako eskola egon zen eraikina eta ingurunea berritu dituzte. Frontoiaren atzeko aldean dagoen Arabar bola jokoan aritzeko aire libreko bolatokia ere Santiago egunerako berritu nahi zuten, baina berrikuntza lanak ez dira garaiz iritsiko. Izan ere, auzoko guneak berreskuratzearekin batera, Santiago egunaren bueltan antolatzen dituzten jaiak indartu nahi dituzte bizilagunek. Azken urteetan Sigmako pilota txapelketako finalak bakarrik antolatzen zituzten egun honetan, baina aurten bi egunetarako egitaraua osatu dute.

Uztailaren 25ean, Santiago egunean, txapligu jaurtiketarekin hasiko dituzte auzoko jaiak eta meza ospatuko dute gero auzoko kaperan. Eguerdian Sigmako 34. pilota txapelketako finalak jokatuko dituzte. Loidik eta Ayestak Kortaberriaren eta Konderen aurka jokatuko dute bigarren mailako finalean, eta lehen mailako finalean, berriz, anaien artekom lehia ikusteko aukera izango da, Txurrukak eta Gerrikak Txurrukaren eta Kortasoren aurka jokatuko dute-eta. Ohi duten legez, txapelketako antolatzaileek jan edana eskainiko diete Sigmako frontoian batzen diren ikusleei.

Arratsaldean haurrei eskainitako ekintzak izango dira nagusi: umeentzako jolasak, Gorriti eta bere abereak eta txokolatada. Gauean, berriz, afari herrikoia egingo dute eta DJ batek girotuko du afalostea.
Azkenik, uztailaren 26rako bi txapelketa antolatu dituzte, mus txapelketa eta igel-toka txapelketa. Eulogio Estarta elkartean jokatuko dute mus txapelketa eta 20 euro ordaindu beharko ditu bikote bakoitzak parte hartzeko. Irabazleek garaikurra, bildots bat eta bi txanpain botila jasoko dituzte saritzat.

 

∞Lotura duten albisteak:

• Sigmako eskola zaharberritu dute auzotarrek eta Udalak elkarlanean (2014-05-07)
• 241 lagun batu ziren Sigman, garai zaharrak gogoan (2013-07-26)