Bihar, Euskal Herriko arraza libreko artzain txakur txapelketa izango da ekintza nagusia. 17:00etatik aurrera artzain eta txakurrak arituko dira lanean, eta tartean, Jose Antonio Arrillaga aiastiarrak ere parte hartuko du. Gauean, Egaña eta Arzallus bertsolariekin egingo dute bertso- afaria.
Aiastiara korrika igoera jokatuko dute domekan. 12:00etan irtengo dira korrikalariak kalegoen plazatik, eta Murkaikupe frontoirainoko ibilbidea egin beharko dute korrika. Guztira bost bat kilometro dauzka ibilbideak. Interesatuek lasterketa hasi aurretik eman beharko dute izena, kalegoen plazan bertan. Iaz 27 lagunek hartu zuten parte, eta Igon Manzisidor debarra izan zen helmugan azkarrena. Domeka arratsaldean idi-demak izango dira.
Astelehenean, San Migel Egunean, auzotarren arteko pilota partidak jokatuko dituzte Murkaikupe frontoian.