Apustu bitxiak egindakoa da Inaxio Arregi azpeitiarra. Ezagunena, beharbada, 104 kiloko burdin zatia sorbaldan hartu eta Urko mendira (Eibar) igo zenekoa izango da. Sei ordu eta 45 minutuan igo zuen burnia, majo kostata izan bazen ere,
2002an egindako apustuan. Orduan erabili zuen burdin zatiaren oso antzerako beste batekin, 80 kilokoa hau, arituko da orain beste desafio bitxi batean. Mendaroko giza-proba taldeko sei lagun izango ditu aurrez aurre, Errosario kaleko jaien barruan antolatu duten deman. Mendaroarrek 500 kiloko harria mugitu beharko dute, eta Kalebarren plazako probalekuan 20 minutuko denboran plaza gehien egiten dituenak irabaziko du saioa. Datorren zapatuan, urriaren 11n jokatuko dute, 12:30ean.
•Egitarau zabala
Errosario kaleko jaiekin jarraituz, gaur iluntzean salbea abestuko diote Ama Birjinari, meza ostean (20:00).
Bihar, hilak 8, txokolatea banatuko dute Errosario kalean bertan, eta Elgoibarko Izarra Euskaltzaleon Topagunearen Atxutxiamaika Sailak guraso eta semealaben arteko transmisioa sustatzeko sortutako Kiribil barraskiloa ere jaira batuko da, 18:00etan. Eguenean, berriz, zezentxoak ekarriko dituzte, 18:00etan, eta txarangaren kalejirak alaituko du barixaku arratsaldea. Egun horretan Igel toka jokoa ere izango da.
Zapaturako, berriz, herri kirol saioa antolatu dute, eta domekan, ohi legez, Errosario kaleko Ama Birjinaren aldeko ezpata dantza dantzatuko dute Haritz dantza taldekoek, 12:00etan.
