Maite Maiorak bigarren egin du munduko kopan, Italian txapelketako azken proba irabazita

elgoibarren.net 2014ko urr. 11a, 20:25
Deskargatu Info Ahotsak :
es en fr

Sky Running World Series txapelketako azken proba puntuagarria jokatu dute gaur Italian, Limone Sul Gardan herrian, hain zuzen ere. Maite Maiora mendaroarra izan da azkarrena emakumezkoetan, eta honenbestez, bigarren postuan amaitu du mendi lasterketen munduko kopa. Mendaroarrarentzako albiste onak ez dira hor amaitu, ordea, mendiko lasterketen Espainiako Kopa ere irabazi baitu. Gaur jokatu da Lanzaroten Kopako azken proba (IV. Haria Extreme), eta parte hartu ezin izan duen arren, inork ez dio kendu sailkapen nagusian zuen lehen postua.



1706636457380 Maite Maiorak bigarren egin du munduko kopan, Italian txapelketako azken proba irabazi

Egun borobila izan da gaurkoa Maite Maiorarentzat, eta ziurrenik baita ahaztezina ere. Batetik, mendi lasterketen munduko Kopako proba bat irabazi du estreinakoz, Italian jokatu den Limone Extreme Skyrace lasterketa, hain justu ere. Gainera, garaipen honi esker eta aurreko probetan pilatutako puntuei esker, sailkapen nagusiko bigarren postuan amaitu du Munduko mendi lasterketen Kopan. Mendaroarra beraz Munduko txapeldunordea da. Bost probek osatzen dute mendi lasterketen munduko kopa: Zegama-Aizkorri mendi maratoiak, Canazein (Italia) jokatzen den Dolomites SkyRace probak, Suitzan jokatzen diren Course de Sierre-Zinal eta Matterhorn Ultraks probek, eta Limone sul Gardan jokatu berri duten Limone Extreme SkyRace lasterketak.

 Maite Maiorak 2:47:05eko denboran amaitu du gaur Limone Sul Gardako paraje ikusgarrietan jokatu duten proba. Aurtengo Zegama-Aizkorri mendi maratoia irabazi zuen Stevie Kremer estatubatuarra sailkatu da bigarren postuan, 2:49:03 denborarekin eta Elisa Desco italiarra izan da hirugarren (2:52:40). Gizonezkoetan Petro Mamo eritrearrak irabazi du proba (2:14:25)

 Bestetik mendi lasterketen Espainiako Kopako azken proba jokatu dute gaur Lanzaroten, IV. Haria Extreme proba. Italian zegoela-eta parte hartzerik izan ez duen arren, sailkapen nagusuan Maiora aurreratu zezaketen antxitxikariak ez dira aurreneko postuetan sailkatu eta lidergoari eutsi ahal izan dio Maiorak.
 
 
 
 
Kirola Elgoibar