Gorbeia Suzien Banco Mediolanum Sari Nagusia jokatu zuten zapatuan, eta 425 parte hartzaile batu ziren Zeanuriko irteeran, horietako batzuk goi mailako korrikalariak, Zegama-Aizkorri mendi maratoiaren ostean gure lurretan jokatzen den lasterketarik garrantzitsuenetarikoa baita Gorbeia Suzien. Izan ere, aurten urrats berri bat eman dute, nazioarteko mendi-lasterketen federazioko (ISFko) Skyrunner National Series zirkuitoan sartuz. Horrela, Gorbeia Suzien 2014ko Skyrunner National Championship izan da.
Gasteizen bizi den Ionut Alin Zinca errumaniarrak irabazi zuen proba hirugarrengoz; berak irabazi ditu edizio guztiak.
Emakumezkoetan Maite Maiora zen faborito nagusia, joan den astean Limone Sul Gardan (Italia) lortutako garaipen handiaren ostean, eta oztopo handiegirik gabe lortu zuen proba irabaztea. Antonella Confortolla italiarra saiatu zen Maiora estu hartzen ibilbideko lehen igoera gogorrean, baina ez zuen bere helburua lortu. Aldiz, Maiorak berak bizitu zuen erritmoa zortzigarren kilometrotik aurrera, eta atzean laga zituen aurkari guztiak. Lehen postuan sartu zen helmugan antxitxikari mendaroarra, 3:14:42ko denborarekin. Azara Garcia de los Salmones iritsi zen bigarren postuan, 3:26:20ko denborarekin eta Antonella Corfortolla sailkatu zen hirugarren (3:28:26). (Sailkapenak)
*Argazkiak: Fotoiosu eta Iñaki Palin.
