Gutxienez 30 segundoko koreografiak eskatzen zituzten Euskadi Gaztea irratiak antolatutako Gaztea Dantzan lehiaketan, eta 70 koreografiatik gora jaso ostean, hogei finalistak aukeratu ditu epaimahaiak. Finalisten artean dago Mendaroko neska talde batek aurkeztutako koreografia. Goiuri Urain, Enara Agirrezabala, Celia Rico, Leire Kerexeta, Marina Rico, Jara Larrañaga, Nerea Arriola, Irati Arrizabalaga eta Ruth Larrañaga mendaroarrek Michael Jacksonen Billie Jean abestiarentzako sortu duten koreografia aurkeztu zuten lehiaketara (beheko bideoan ikus dezakezue).
Entzulearen Saria erabakitzeko bozketa-fasea jarri dute abian lehiaketako antolatzaileek. Azaroaren 12ra arte ema daiteke bideo gustukoenaren aldeko botoa, Gaztea Dantzanen webgune berezian. Entzulearen Sariaren irabazleak 1.000 euro eskuratuko ditu; bigarren sailkatuak, 500 euro, eta hirugarrenak, 300 euro. Bestalde, Epaimahaiaren Saria jasotzen duen taldeak 750 euro eramango ditu. Bozketa fasea amaitu ondoren, Euskadi Gaztea irratiko Dida saioan iragarriko dute sariak norentzat diren.