Musika eta makinen hotsak uztartuko ditu Kataia ikuskizunak makina-erremintaren museoan

elgoibarren.net 2014ko azaroaren 14a

Makina-erremintaren mendeurreneko ospakizunen barruan, Kataiak izeneko ikuskizuna aurkeztu dute gaur. Aitor Nova musikari elgoibartarraren proiektu honek musika, museoko makinen hotsak eta enpresetan grabatutako irudi zein soinuak uztartzen ditu, makina-erremintaren iragana, oraina eta etorkizuna irudikatuz. Azaroaren 28an eskainiko dute Elgoibarko makina-erremintaren museoan, eta hiru saio izango dira: 19:30ean, 20:30ean eta 21:30ean, eta sarrera doan izango da.

Ricardo Garate, Jagoba Astiazaeran eta Aitor Nova, Kataiak egitasmoaren aurkezpenean, museoan.

Kataiak 30 minutuko ikuskizun interaktiboa izango dela aurreratu du Aitor Novak. “Ikusleek estimulu asko jasoko dituzte. Izan ere, ikuskizunaren lehen zatian, publikoa museoko bisitari bihurtuko da, eta musikariek bertako makinak bailiran jokatuko dute. Hala instrumentuen soinua makinen hotsekin eta bisitarien pausoekin uztartuko da”.

Ikuskizunaren bigarren zatia museoko nabe zentralera mugatuko da. Han, zuzeneko musika, elektronika eta irudien bidez, ikus-entzunezko berri bat sortuko dute. Aitor Nova berak ere parte hartuko du zuzeneko musika jartzen.

Zuzenean joko duten musikaren partiturak, berriz, Jagoba Astiazaran konpositore gazteak sortutakoak dira. Bi sortzaileek goiko bideoan azaltzen dituzte Kataiak ikuskizunaren nondik-norakoak.

Kultura Elgoibar