Bertsolari Txapelketa Nagusien osteko saioetan gertatu ohi den legez, bertso gosez zeuden bertsozaleak eta eserleku bat bera ere ez zen libre geratu San Bartolome parrokian. Lekua hartzeko asmoz ordubete lehenago ere joan ziren zenbait parrokiako atarira. Izan ere, Elgoibarko Izarrak osatutako kartela ez zen edonolakoa, azken hiru Bertsolari Txapelketa Nagusietako irabazleek bat egin zuten-eta Elgoibarko bertso saioan: Andoni Egañak, Maialen Lujanbiok eta joan den abenduaren 15ean txapela jantzi zuen Amets Arzallusek. Igor Elortza eta Onintza Enbeita bizkaitarrek osatu zuten boskotea. Gai-jartzaile lanetan aritu zen Uxue Alberdik gidatu zuen bertso saioa.
- Saioa oso-osorik jasotzen duen bideoa duzue hemen, eta, baita Andoni Egañak abestu zituen hiru bertso jasotzen dituena eta bertsolari guztien agurreko bertsoen bideoa ere.