Eskubaloiko emakumezkoen euskal selekzioak VIII. Emakumezkoen Lau Nazioen Torneoa jokatuko du, ekainaren 6an eta 7an, Elgoibarko IMH kiroldegian. Hortaz, kiroldegi berriaren inaugurazioa izango da. Galizia, Katalunia eta Valentziako selekzioekin neurtuko dituzte indarrak jokalari euskaldunek. Partida hau jokatzeko Oihane Gomez atezain elgoibartarra deitu du Euskadiko hautatzaile Imanol Alvarezek.
Klub Deportibo Elgoibarko alebin mailako futbol taldeak bigarren postua eskuratu du Oxforden, Ingalaterran, jokatutako futbol txapelketa batean. Errifak eta publizitatea saltzetik lortu dute bidaia finantzatzeko dirua, eta hori dela-eta herritarrak eta babesleak eskertu nahi izan dituzte taldeko arduradunek. (argazkiak dauzka)
Zegama Aizkorri Kilometro Bertikala jokatu zuten estreinakoz joan den barixakuan (maiatzak 15). Gizonezkoetan Josep Viñas izan zen azkarrena eta Iñigo Larizek egin zuen bigarren denborarik onena, irabazleak baino 11 segundo gehiago, hain justu ere. Zegama-Aizkorri mendi maratoia jokatu dute gaur, baina lasterketa irabazteko faboritoen artean zegoen Maite Maiorak ez du parte hartu, belauneko lesio bat dela-eta.
Duela hainbat hilabete iragarri zuten Lagunak pilota eskolako arduradunek aurtengo ikasturtean utziko dutela pilota eskola eta hasiak zirela errelebo bila. BARREN aldizkarian ere mezu hori berretsi zuten orain bi aste. Bada, agertu da eskolari tira egiteko prest dagoen lagun taldea.
Eusko Label banakako aizkora txapelketako urrezko mailako kanporaketa jokatuko dute zapatuan (maiatzak 2) Elgoibarren. Jose Mari Olasagasti (Igeldo), Ugaitz Mugertza II (Mutriku), Donato Larretxea (Bera) eta Ander Erasun (Aurtitz) aizkolariek jardungo dute lehian.