Trinitate Eguna ospatzen ari dira gaur Elgoibarren. Goizean goizetik artisau azoka izan da Lekuederren, eta eguerdian Inazio Bereziartua musika eta dantza eskolak antolatutako umeen danborrada egin dute. Kalegoen plazan hasi eta herri guztia zeharkatu dute, ohikoa duen karroza erraldoiarekin.
Trinitate jaiak musika, danbor eta kupel hotsez jantzi zituen bart gauean danborradan. Jotzen eta dantzan ari zirenez gain, herritarrek ere jai giroan murgiltzeko aukera izan zuten.
Elgoibarko baserrietako sagardo lehiaketak badu irabazlea: Armazio baserria. 13. urtez antolatu du lehiaketa Zazpiki elkarteak, eta Armaziok seigarren aldiz irabazi du. Jende asko ibili da sagardoa dastatzen, eta antolatzaileek esan dute aurtengo lehiaketak maila handia izan duela.