Kultur Etxeko hitzaldi gelan izango da Ander Iriarteren “Transexualitatea aniztasunaren adibide bat” hitzaldia, 19:00etan. Saiora gerturatuko diren herritarrek, gai honen inguruan izan ditzaketen kezkak zein galderak erantzuten ahaleginduko da Iriarte. 18 urte ditu eta 15 urte zituela kontatu zuen etxean transexuala zela.
Uztailaren 1era bitartean, beste zenbait ekitaldi ere egingo dituzte Elgoibarren, jarduera desberdinak antolatu baititu Elgoibarko Udalak, Batxilergoko Hezkidetza taldearekin, Emakumeen Kontseiluarekin, Elgoibarko Izarrarekin eta Naizen elkartearekin elkarlanean.
• 'Ortzadarra 'ekimena
Ekainaren 26an, eguaztena, egingo dute Ortzadarra izeneko ekimena, 19:00etan, Maalako parkean. Batxilergoko Hezkidetza Taldeak Maalako parkeko gune bat ortzadarraren koloreekin margotuko du. Modu sinboliko baten, Elgoibar ere, LGTBI+ kolektiboarekin lagunkoia dela erakutsi nahi dute.
• Kiribilen saioko bideoa
Aurreko hileko Kiribilen plazako ekintzan, maitasun askearen eta aniztasunaren gaia landu zuten herriko familiekin. Ekainaren 28an, atari honetan, bertan grabatutako irudiekin osatutako bideoa aurkeztuko da, “Maitasun askea” tituluduna.
• Elkarretaratzea
Batxilergoko Hezkidetza Taldeak antolatuta, elkarretaratzea egingo dute ekainaren 28an, Sexu Askapenerako Nazioarteko Egunean. 12:00etan izango da, Kalegoen plazan. Manifestua ere irakurriko dute.
• “Sexualitate anitzak” saioa
Emakumeentzako Jabetze Eskolaren barruan, “Sexualitate anitzak” izeneko saioa emango dute uztailaren 1ean, 18:00etan, Kultur Etxeko hitzaldi gelan. LGTBI+ kolektiboarekin sentsibilizazioaren inguruan eta Elgoibarko errealitatearen inguruan hausnartuko dute saioan. Maiatzaren 17an aditzera eman zen notiziaren inguruan ere arituko dira; “Transexualak gaixotzat ez jotzeko lege aldaketa abian da.Eusko Legebiltzarrean”.
