Udazkenean egingo dute Euskaraldia ariketa sozialaren hirugarren edizioa, azaroaren 18tik abenduaren 2ra. Maila pertsonalean nahiz kolektiboan parte hartu ahal izango da, baina ariguneak indartzea izango da aurtengo erronka [maiatzaren 18tik zabalik dute izena emateko epea]. Eta hirugarren Euskaraldiaz eta orain arteko biek eman dutenaz eta eman ez dutenaz jardun zen joan zen astean Elgoibarren Kike Amonarriz soziolinguista, Elgoibarko Euskaraldia Taldeak eskatuta. Amonarrizek garbi laga zuen Euskaraldia ez dela euskarak dituen gaitz guztientzako soluzioa, baina hizkuntza-ohituretan aldaketak eta hobekuntzak ekarri dituela, parte hartu dutenen gehiengoak euskara gehiago egiten duelako gaur, lehen baino.
Gazte Euskaltzaleen Sareak bultzatuta Euskara aurrera manifestazioa izango da Donostian, zapatuan, maiatzaren 21ean. "Herri bultzada berri bat" abian jartzera deitu dituzte euskaltzale guztiak, uste baitute egungo hizkuntza politikak ez direla "aski" euskarak dituen "erronkei" eta "zailtasunei" erantzuteko.
Euskaraldiaren barruetan aztarka jardun zen Kike Amonarriz soziolinguista atzo Elgoibarren, Elgoibarko Euskaraldia Taldeak eskatuta. Euskaraldia nazio mailako ariketa noiz, zergatik eta zertarako sortu zuten azaldu zuen eta lorpenak eta erronkak aletu zituen gero.