Giro bikainarekin jokatu da gaur Nazioarteko Juan Mugertza krosaren 73. edizioa Mintxetan. Guztira 700 atleta inguruk hartu dute parte jokatu diren hamar lasterketetan. Nagusien mailan, Irene Chepet Cheptai keniarra izan da azkarrena eta Aweke Ayalew etiopiar jatorriko bahraindarra gailendu da gizonezkoetan, duela bi urte emakumezkoen lasterketa irabazi zuen Hiwot Ayalewren anaia, hain justu ere. (argazkiak dauzka)
Antxitxika egiteko baldintza egokiak izan dituzte gaur Mugertza kroseko parte hartzaileek, zerua oskarbi eta 16 graduko tenperatura; eta, krosa jarraitzera Mintxetara igo diren herritarrentzat ere goiz atsegina egin du urtarrileko domeka bat izateko. Gizonezkoen lasterketa nagusia irabazi duen Aweke Ayalewk ere bere gustuko eguraldia egin duela nabarmendu du proba amaieran. Ayalewk 22 urte ditu eta Etiopiako hiriburu Addis Abeban bizi da, nahiz eta Bahraingo nazionalitatea duen duela hiru urtez geroztik. Iaz, 10. postua lortu zuen Txinan jokatu zen Munduko Kros Txapelketan, eta kros denboraldi honetan Venta de Baños-eko krosa eta Antrimgo Nazioarteko Krosa (Belfast, Ipar Irlanda) irabazi ditu. Hortaz, azken orduan Conseslus Kipruto ordezkatzera etorri bada ere, sasoi betean ailegatu da Elgoibarrera. Irteeratik sentsazio onak izan dituela adierazi du eta "oso eroso" egin duela antxitxika. Tamirat Tola etiopiarra izan du aurkari nagusia. Alcobendas eta Italicaco krosak irabazi berri ditu Tolak, -IAAF egutegi barrukoak biak-, eta Elgoibarren garaipena eskuratzeko faborito argia zen. Ayalewk ere onartu du Tolari irabazi dion estreinako aldia izan dela.
Tolak proba amaieran azaldu duenez, tripako minak izan zituen barixakuan eta medikuarengana ere jo behar izan zuen. Zegoen egoeran bigarren postua lortuta pozik dagoela gaineratu du. Olinpiar Jokoetan 10.000 metroko proban lehiatuko den Etiopiako taldean sartzea izango da Tolaren helburua.
•Ayalew korrikalari dinastia
Awewke Ayalewk San Vitore Olonako krosean hartuko du parte datorren domekan, Italian. Denboraldiko bere helburu nagusia, baina, Rio de Janeiroko Olinpiar Jokoetarako sailkapena lortzea izango da. 10.000 eta 5.000 metroetako lasterketetan parte hartzea nahi du, "Mo Farah edo Kenesisa Bekelek moduan", esan du. Korrikalari familiako kidea da Aweke Ayalew. Zazpi anai arreba dira; lau arreba eta hiru anaia, eta arrebetako hiru goi mailako antxitxikariak dira. Ezagunenak dira Yimer Wude Ayalew, 2012ko Mugertza kroseko irabazlea eta Hiwot Ayalew -2014. urteko Mugertza kroseko irabazlea-.
•Cheptai keniarrra nagusi emakumezkoetan
Asko dira Mugertza krosean garaipena lortu duten atleta keniarrak, baina 2009az geroztik ez zuen Kenyako atleta batek emakumezkoen lasterketa nagusia irabazten. Irene Chepet Cheptai (Kenya, 1992) izan da keniarren lehorteari amaiera eman diona. Helmugan 22 segundoko aldea atera dio Netsanet Gudeta etiopiarrari eta 34 segundokoa Alemitu Heroyeri (Etiopia, 1994). Heroyek min hartu du zango batean eta ozta-ozta lortu du proba amaitzea. Gurutze Gorriak hartatu behar izan du eta ezin izan du sari banaketa ekitaldian parte hartu.
Cheptaik 7. postua lortu zuen iaz Txinako Guiyangen hirian jokatu zen Munduko Kros Txapelketan. Elgoibarren aurrez ere izana da: hirugarren postua lortu zuen 2013. urteko Mugertza krosean. 23 urteko atleta gazteak ere korrika egiteko eguraldi “zoragarria” egin duela azpimaratu du amaieran prentsari egin dizkion adierazpenetan. Kenyara itzuliko da orain Olinpiar Jokoetarako sailkatzeko uztailean egingo dituzten hauta probetarako prestatzera. 10.000 metroko lasterketan parte hartu nahi du Rio de Janeiron.
•Mamo Wolde Saria
Mamo Wolde Gipuzkoako sariaren 14. edizioan junior mailako Europako atletarik onenetarikoak lehiatu ziren Mintxetan. Emakumezkoen proban Celia Anton espainiarrak lortu zuen garaipena eta Hugo Hay frantziarrak irabazi zuen mutilen proba.
•Martin Hernandezen garaipena kadeteetan
Mintxeta Atletismo taldeko hainbat korrikalarik hartu zuten parte behe mailako kategorietan. Martin Hernandezek kadete mailako lasterketan lortu zuen garaipena nabarmendu behar da. J.A. Sabadell taldeko Ayoud Ait Adbi sailkatu zen bigarren eta CEIE Gironi taldeko Elvin Josue Canales sailkatu zen hirugarren postuan.
•Argazki bilduma:
∞Lotura duten albisteak:
-
Aitari eskainitako oroigarria ezagutzen izan dira Mamo Wolderen semea eta alaba (2016-01-22)
-
Munduko zortzi kros onenen artean bigarrengoz (2016-01-19)
-
Mimi Belete bahraindarra eta Teklemariam Medhin eritrearra gailendu dira 2015eko Mugertza krosean (2015-01-25)
-
Mugertza krosak goi mailako parte hartzearekin estreinatuko du IAAF kategoria (2015-01-21)
-
Ayalew etiopiarra eta Toroitich ugandarra garaile Mugertza krosean (2014-01-12)
- Mugertza krosa: Ayad Lamdassem, azken orduko fitxaketa (2014-01-10)
- Kipruto eta Bett, iazko txapelduna eta txapeldunordea Mugertza kroseko irteeran izango dira domekan(2014-01-08)
- Kipruto keniarra eta Burka etiopiarra garaile Mugertza krosean (2013-01-14)
- Atleta izatea, Jairo Berbelen begietan (2013-01-10)
- Aurkeztu dituzte Mugertza krosean parte hartuko duten korrikalariak (2013-01-09)
- Mamo Wolderen lehen garaipenaren 50. urteurrena akorduan (2012-12-18)
- Mugertza krosa Estatuko hiru onenen artean dago (2012-04-25)
- Tanui kenyarra eta Wude etiopiarra nagusi Mugerza krosean (2012-01-22)
- Beste lau urtez luzatu dute lankidetza hitzarmena Mintxeta A.T.ak eta Udalak (2011-12-23)
- Mugerza krosa Europako krosen egutegi ofizialean sartu dute (2011-10-26)
- Antolatzaileak pozik Mugertza krosaren kirol maila eta ikusle kopuruarekin (2011-01-25)
- Hirugarren garaipena Leonard Komonentzat Mugertza krosean (2011-01-23)
