Beasainen hasi eta amaitu diren iraupen luzeko hiru mendi proba jokatu dira asteburuan: Ehunmilak, Goierriko Bi Handiak eta Marimurumendi. Joseba Elustondo elgoibartarrak 35 ordu eta 48 minutuan amaitu zuen lehenengoa, 168 kilometroko ultratrail mendi proba. Goierriko Bi Handiak proban 13 elgoibartarrek hartu zuten parte, tartean hiru emakumek; eta azkenik, Ainhoa Lendinezek bigarren postua eskuratu zuen estreinako aldiz egin duten Marimurumendi mendi maratoian (sailkapenak, argazkiak eta bideoak dauzka)

I. Marimurumendi Mendi Maratoiaren aurreneko irabazlea Iker Zurutuza izan da gizonetan, eta Itziar Andueza beasaindarra emakumeetan. Ainhoa Lendinez elgoibartarra bigarren postuan sartu zen helmugan. Bere esanetan, bizitzan egin duen lasterketa politena izan da eta baita orain arte egin duen onena ere.

Eva Fernandez kantabriarrak eta Lendinez berak hartu zuten lasterketaren burua hasieratik eta aurreneko postu horietan mantendu ziren biak azken kilometroetara arte. Lendinezek indarrez ikusi zuen bere burua 38. kilometroan, proba amaitzeko lau kilometroren faltan, eta Fernandezen pareraino iristeko ahalegina egin zuen. Lortu zuen liderrarekin bat egitea eta baita atzean lagatzea ere. Hala, 41. kilometrotik lehen postuan pasa zen Lendinez, baina bikiak igo zitzaizkion orduan. ìBeasainen sartuta nengoela bikiak igo zitzaizkidan eta hirugarren eta laugarren zetozenek aurrea hartu zidaten. Ezin nuen sinistu! lurrean nengoen ia, ezin mugituta. Han zegoen mutil batek behatzak gogortu eta gemeloak jaitsi zirenean berriz atera nintzen zistu bizian. Bigarren zihoana harrapatu nuen baina lehenengoa harrapatzeko aukerarik ez nuen izan. Pena, txapela oso gertu neukalako, bikiak igoko ez balira txapela buruan izango nuke, seguru, denborak ikusi besterik ez dago, segundoak atera zizkidan, baina halakoa da kirola. Ni honekin geratzen naiz: 41. kilometroan galdu nuen txapela, baina ez garaipena!”. Itziar Andueza irabazlearengandik 17 segundora sartu zen helmugan Lendinez, lau ordu, 37 minutu eta 50 segundoko denborarekin. Olabarriako Amaia Intsausti sailkatu zen hirugarren postuan (4:38:14). (sailkapen osoa)

• Joseba Elustondok 35 orduan amaitu zuen Ehunmilak proba

241 lagun batu ziren barixaku arratsaldean, Beasainen, Ehunmilak 168 kilometroko mendi lasterketaren irteeran. 150 lagunek lortu zuten proba gogor hau amaitzea eta Imanol Alesonek irabazi zuen proba, hirugarrengoz. Azkoitiarrak 24:11:00ko denbora behar izan zuen 168 kilometroak osatzeko. Bi elgoibartarrek hartu zuten parte proban, Joseba Elustondok eta Iban Fernandezek. 75. postuan sailkatu zen Elustondo, 35:48:42ko denborarekin. Fernandezek, berriz, ezin izan zuen proba amaitu. San Adrianera (139. kilometroan) iritsi baino lehen laga zuen proba. (Ehunmilak probako sailkapena)

• 13 elgoibartar Goierriko Bi Handietan

Iokin Garai oñatiarrak irabazi du aurtengo Goierriko Bi handiak proba. Irabazleak 10:13:50eko denboran osatu zituen ibilbideko 88 kilometroak. Emakumezkoetan, Silvia Trigueros abadiñoarra izan zen azkarrena 12:15:34ko denbora eginda (sailkapen nagusia). Gure ordezkariei dagokionez, 13 elgoibartarrek amaitu zuten proba, tartean hiru emakumezkok. Hona hemen elgoibartarren sailkapena:

• 17. Gorka de la Horra (12:09:08)
• 71. Josu Idiakez (14:11:01)
• 155. Angel Quintana (16:23:52)
• 165. Lander Azpiazu (16:28:36)
• 225. Mikel Arosa (17:40:49)
• 226. Julen Salaberria (17:40:51)
• 227. Haritz Arribillaga (17:40:52)
• 319. Fernando Calvo (20:48:23)
• 329. Jon Peli Uriguen (21:02:01)
• 330. Ekaitz Baskaran (21:02:03)
• 18. Izaskun Hurtado (19:58:04)
• 20. Ane San Martin (20:48:32)
• 21. Arantza Beristain (21:02:10)

Edu Uribek Azkarate gainean grabatutako bideoa: 

• Elgoibartarren emaitzak Ehunmilak ultratrailean eta Goierriko Bi Handietan (2013-07-15)

• Edu Uribek 45 ordutan amaitu du Ehunmilak ultratraila (2012-07-16)
• Ehunmilak proban parte hartuko dute Edu Uribek eta Josu Mendikutek (2012-07-11)
• Jose Luis Diezek 45 ordutan amaitu zuen Ehun Milak proba (2010-07-19)
• Hiru elgoibartar Ehun Milak mendi proban (2011-07-13)
• Ehun Milak proba amaitzea lortu dute Asier Arrietak eta Edu Uribek (2011-07-18)