CD Elgoibarrek urteko batzar orokorra egin zuen eguenean (ekainak 23), eta bazkideek presidente eta zuzendaritza berriak aukeratu zituzten. Anton Iranzo Tornos da CD Elgoibarko presidente berria, azken lau urteetan presidente izan den Jesus Mari Unzillari lekukoa hartu eta gero. Hamabost lagunez osatutako zuzendaritza izango du Iranzok klub deportibo Elgoibarrek dituen erronkei aurre egiteko, horietako bat 2017an ospatuko duten mendeurrena.
CD Elgoibarrek urteko batzar nagusia egin zuen eguenean Elgoibarko Kultur Etxean. Urteko balantze ekonomikoa eta kirol balantzea aurkeztu zuen Jesus Mari Unzillak gidatutako zuzendaritzak eta zuzendaritza proiektu berria aurkeztu duen taldeari lekua egin zioten gero mahai buruan. Anton Iranzo presidente berriak hartu zuen hitza, zuzendaritza berriko lau kideren laguntzaz. Euren ikuspegi eta asmo nagusiak azaldu zituen Iranzok eta berdin egin zuten alor desberdinetako (ekonomia, publizitatea, kirola, gizartea) ardura izango duten zuzendaritzako kideek ere.
•Balantze ekonomikoa
Diru kontuei dagokionez, 165.018 euroko gastuak izan ditu klubak 2015-2016 denboraldian eta 165.018 eurokoak izan dira sarrerak. Arduradunek azaldutakoaren arabera 49.543 eurokoa da CD Elgoibarren ondarea, denboraldiko balantzea itxi ostean.
