Elgoibarko Udalak jakinarazi duenez, Maalako errotonda berritzeko egin zuten eskaera onartu du Gipuzkoako Foru Aldundiak. Hala, orain zatituta dagoen biribilgunea osatu eta ohiko biribilgunea egingo dute Maalako zubiaren ondoan.
Elgoibarko Udalak Maalako errotonda berritzeko eskaera egin zion aurreko legegintzaldian Gipuzkoako Foru Aldundiari. Proposamenaz gainera, biribilgune berriaren proiektua ere Udalak idatzi zuen. Eskaerari erantzunez, zatikatutako errotonda ohiko errotonda bihurtzeko dauden aukerak aztertu zituen Diputazioak. Josu Arraiz Hirigintza zinegotziak jakinarazi duenez, jaso dute Foru Aldundiaren baiezkoa. Lizitazio eta beharrezko prozedura guztiak amaitu ostean, Aldundiak egingo ditu errotonda berritzeko lanak, eta finantzazioa ere erakunde horri dagokio. Azpiegitura honi lehentasuna eman izana eskertu dio Arraizek Diputazioari.
•Semaforo bakarra
Lanei dagokionez, biribilgunearen erdiko aldeak gaur egungoaren antzerako neurriak izango dituela azaldu du Arraizek. Semaforoei dagokionez, oinezkoek Urazandi auzora joateko beharko dutena izan ezik, gainerakoak kendu egingo dituzte. Mupem-eko lantokia egon zen eraikinaren aurrean, berriz, oinezkoen babesguneak jarriko dituzte, Altzola parean jarri dituztenen antzerakoak, biribilgunera hurbiltzen diren ibilgailuen abiadura motel arazteko.
∞Lotura duten albisteak:
-
Amaitu dituzte Txankakoako errotondako lanak (2014-03-19)
